La Regiun Surselva (sen. Ernst Sax, president e dretg Roger Tuor, gestiunari) ha mess in tierm impurtont pigl avegnir dalla formaziun en Surselva. Foto Martin Gabriel
Ier mesjamna ha la conferenza dils presidents communals dalla Regiun Surselva approbau il credit da 4,6 milliuns francs per finanziar las novas localitads da scola dil Center da formaziun Surselva ella nova staziun da Glion. La regenza grischuna vegn a decider ils proxims meins davart sia participaziun als cuosts totals da ferm 15 milliuns francs pil niev Center da formaziun Surselva.
Martin Gabriel/FMR
Mesjamna endamaun ein ils presidents communals dalla Surselva seradunai denter auter per decider davart la cumpart dils cuosts che la Regiun Surselva duei surprender pil niev Center da formaziun che vegn ad esser da casa naven da 2028 ella nova staziun da Glion. Cunzun la nova halla da gimnastica che sto vegnir baghegiada sigl areal dalla scola da Glion ha dau da discutar ils davos meins en connex culs cuosts e cun las variantas pusseivlas.
Ier da miezdi ha la Regiun Surselva envidau las medias ad ina orientaziun. Ernst Sax, il president dalla Regiun Surselva, ed il meinagestiun Roger Tuor han fatg da saver che la conferenza dils presidents hagi detg GIE ad in credit global da ferm 4,6 milliuns francs pigl edifeci niev dil Center da formaziun ella staziun dalla Retica e per la sligiaziun dall’instrucziun da gimnastica dallas scolas. Ernst Sax ha detg: «Ils presidents communals han priu ina fetg clara decisiun en favur dalla formaziun futura en Surselva. La finanziaziun succeda ord las reservas dil sectur dalla formaziun dalla Regiun Surselva (1,1 milliuns francs) e dallas reservas dalla gestiun dils rumians (3,5 milliuns francs).
Contracts e cuosts totals
La conferenza dils presidents dalla Regiun Surselva ha er approbau il contract da dretg da construcziun per la nova halla da gimnastica. Quei ei in contract denter la Regiun Surselva e la vischnaunca Ilanz/Glion. La davosa mesjamna haveva il parlament communal da Glion decidiu da ceder alla Regiun Surselva il dretg da baghegiar per ina parcella sigl areal sper la casa scola el Paradiesgärtli da Glion.
Ultra da quei ha la conferenza da presidents era approbau il contract d’affittaziun per la scola culla Viafier retica per la nova scola egl edifeci dalla staziun. Quei culla premissa ch’il cantun approbeschi il credit e concedi sia participaziun als cuosts. Cumpart dils cuosts totals da ver 15 milliuns francs per l’entira midada dil Center da formaziun Surselva ein era las lavurs da construcziun da basa per las localitads da scola, e plinavon differentas lavurs da construcziun specialas sco per exempel ina cuschina e la mensa e plinavon era stanzas ed indrezs da chemia e musica. Ultra da quei vegn la Regiun Surselva a pagar alla Retica ina summa unica directa da 5 milliuns francs. Quella summa ei in pagament a quen dil tscheins d’affittaziun che sesbassa cheutras da 29 000 sin circa 12 000 francs il meins.
Summa dil cantun aunc aviarta
La regenza grischuna ha aunc d’approbar sia cumpart dils cuosts dalla midada dil Center da formaziun Surselva. Il gestiunari dalla Regiun Surselva, Roger Tuor ha detg mesjamna, ch’el seigi optimistics ch’il cantun vegni a surprender ina part dils 15 milliuns francs. «Nus savein buca dir oz definitivamein con ch’il cantun vegn a contribuir. Mo sche la summa ch’ins ha mess en vesta a nus vegness approbada dalla regenza, fuss quei in ferm ‹commitment› en favur dalla Regiun da formaziun Surselva.»
Halla temporara
«La sligiaziun per l’instrucziun da sport ei era stada pils presidents da vischnaunca ina decisiun centrala digl entir project» ha il president dalla Regiun Surselva Ernst Sax detg alla conferenza da medias. «Quei tonpli ch’il cantun ha claras directivas ch’ei sto dar ina pusseivladad d’absolver las uras da gimnastica en in liug adattau.» La Regiun vegli ussa procurar per ina sligiaziun ensemen cun la vischnaunca Ilanz/Glion. «Il dretg da baghegiar ha il parlament communal da Glion gia concediu a nus. Quei ei stau ina premissa indispensabla per vegnir vinavon», di Ernst Sax. Tenor il stan dad oz vegni la Regiun Surselva a baghegiar ina halla da gimnastica provisoria che duei far siu survetsch aschi biars onns sco pusseivel. Ils cuosts per quella halla muntian a circa 2,3 milliuns francs. La construcziun d’ina halla da gimnastica definitiva custass denton denter tschun e sis milliuns francs.
Ils proxims pass dalla Regiun Surselva pertuccont la bardigliada dil Center da formaziun Surselva ein lavurs da detagl pertuccont la planisaziun dallas localitads da scola.