Per demonstrar per lur dretgs e per festivar la diversitad. «Queerbünda Gründa» è stà il motto da la segunda Khur Pride.
rtr/fmr
Sonda passada han las colurs da l’artg embellì per las segunda giada la citad da Cuira. Curt suenter gentar ha il til da la Khur Pride cumenzà sin la plazza da la staziun ed è ì fin il Stadtpark, suandà da pleds d’inauguraziun per tudestg, talian e rumantsch. Enramà è il program vegnì da la furmaziun da tiba Heidiland. La suletta manifestaziun per persunas queeras en il chantun Grischun è stà sut il motto «Queerbünda Gründa».
La KhurPride saja in moviment da celebrar e normalisar dad esser queer en l’entir chantun, scrivan ils organisaturs sin lur pagina d’internet. Schegea che tut saja fitg festiv, saja impurtant da vesair, che questa Khur Pride saja il medem mument er ina demonstraziun per ils dretgs da persunas da tut ils genders e tuttas sexualitads.