Mic Armon Conrad reflectescha davart satgados – davart quels concrets e quels figurativs
Mic Armon Conrad/GIURU
Tgi na l’enconuscha betg, il renumnà satgados. Il satgados che nus tuts purtain cun nus, mintga di, tuttina nua che nus giain, tuttina tge che nus faschain. Tar intginas persunas è il satgados bain vesaivel ed ins po stimar ad egl quant grev ch’el pudess circa esser. Autras persunas al pacheteschan en moda eleganta e cumpacta, uschia ch’igl è pli u main nunpussaivel da giuditgar la chargia. A medem temp na vesan betg tuts cun ils medems egls, ubain ch’intgins na s’accorschan betg dals satgados dals auters.
Igl è però er da dir, ch’i dat plirs models da satgados. Ils ins, plitost malpratics, vegnan purtads mo vi dad ina singula tschinta. Tar persunas che portan in tal satgados vesan ins vaira spert l’effect da la chargia, perquai che questa n’è betg equilibrada. Quai ha la consequenza, che las persunas chaminan savens tort e sa schirentan las spatlas ed il culiez. A lunga vista po quest dischequiliber chaschunar donns da sanadad. Auters satgados èn construids en moda pli raffinada ed èn uschia pli supportabels. Spezialists en il sectur da bagascha recumondan per il solit da tscherner in satgados uschè confortabel sco mo pussaivel, surtut per persunas che portan gia daditg ina greva chargia.
Ma danunder deriva la chargia? E cun quants onns entschavain nus insumma d’emplenir noss satgados? Intgins consulents pretendan che la chargia vegnia surdada gia durant la gravidanza. Cun observar tscherts uffants pitschens para questa pretensiun zunt credibla. Tar ils ins, che trottan gia tort cun paucs onns, pari bunamain nunpussaivel ch’els hajan rimnà tut la chargia sezs. Forsa èsi pussaivel ch’i vegn surdà pli pauc chargia als uffants, sche ils geniturs sa dattan fadia da diminuir lur chargia uschè ferm sco pussaivel.
Sa deliberar da l’atgna chargia è svelt ditg, ma betg fatg. La metoda preferida è da currer davent, uschè spert e lontan sco pussaivel. In exempel or da la vita da mintgadi èn las vacanzas appreziadas. Quanta glieud sgola lunsch davent per fugir da sia chargia, er sch’i saja mo per in pèr dis. Ma il pli tard cur ch’els turnan enavos, returna er tut la chargia. Mintgatant s’engrondescha la chargia perfin durant il temp ch’els èn davent. La maioritad da la glieud concluda pli baud u pli tard che questa strategia na funcziuna betg, u ch’ella funcziuna mo per in tschert temp. Singuls paran deplorablamain da mitschar tut lur vita, senza success. Ina metoda in zic pli nizzaivla è quella dals uschenumnads «backpackers». Quels prendan cun els lur satgados cumplet sin il viadi. Durant lur aventura vegnan els per il solit en contact cun numerusa glieud da diversas culturas. Questa experientscha als dat savens novas perspectivas e betg darar als gida quai a vesair che lur agen satgados n’è forsa betg uschè grev sco quai ch’els crajevan fin qua.
Ina pitschna midada da perspectiva po midar ina pluna! Sch’ins ponderescha era mo tschintg minutas sur da quai, quant ch’ins ha gia cuntanschì fin ussa, daventa il satgados immediatamain pli liger. In tal mument da reflexiun po era trair endament da controllar las tschintas dal satgados e da las giustar uschia ch’el daventia pli supportabel. Quant levgiond ch’igl è da laschar enavos quitads che n’èn pli actuals! Quai po inspirar da prender en mira novas finamiras, u forsa da finalmain concluder projects ch’èn planisads daditg ennà.
In sguard enten il satgados po er influenzar fermamain l’atgna perspectiva. Forsa ch’il cuntegn n’è gnanc tant pesant sco ch’i para. Forsa portan ins cun sasez almain tantas bellas chaussas sco tridas, sajan quai experientschas marcantas, memorias nunemblidaivlas u relaziuns valurusas. E sch’ins è gia londervi da perscrutar las bellas chaussas enten il satgados pon ins a medem temp las parter cun las persunas che stattan a cor. Forsa che lur satgados daventa tras quai pli liger a medem temp.