Quotidiana dils 28.08.2024
Igl artist Bane ensemen cun Tank e Tino (da sen.) che han realisau l’ovra da graffitti el Bogn Sedrun. El funs in’impressiun dil maletg.Foto Hans Huonder
Ils davos endisch dis ha in team cugl artist Bane, alias Fabian Florin da Cuera, luvrau vid ina pictura da preit cun ina grondezia da 160 meters quadrats el Bogn Sedrun. Sils visitaders futurs dil bogn spetga in’atmosfera fascinonta e captivonta.
Hans Huonder/FMR
Las lavurs da sanaziun dil baghetg dil Bogn Sedrun van a fin. Ils 19 d’october 2024 ei previda la reavertura. Dapi la primavera 2023 vegn fatg leu lavurs da renovaziun e modernisaziun per 12,4 milliuns francs. La spaziusa localitad dil bogn sco tal ch’ei la pli frequentada localitad egl entir baghetg, dispona d’ina suletta gronda preit senza finiastras ed extradas. Visitadras e visitaders dil bogn pon aunc seregurdar tgei maletg che sesanflava leu avon la sanaziun: Palmas, ina cascada ed il sulegl. Da quella fatschada cun ina grondezia da rodund 160 meters quadrats resplenda ussa ina tut autra atmosfera. Ina che regorda vid la mar, vid la veta e vid la fascinaziun dall’aua. Il di dalla reavertura duei il maletg vegnir presentaus alla publicitad.
Bane, Tank e Tino
«Vid quella fatschada havein nus vuliu enzatgei tut special. Per quei motiv havein nus lu era schau maun liber a Bane , igl artist che nus havein engaschau persuenter. Nus havein fatg ina suletta cundiziun: ei astga buc esser in maletg dalla cuntrada. Cuntradas vesin nus avunda cun mirar ord las finiastras dil bogn», di gerau Guido Monn . Ch’ins ha gest dumandau Bane, alias Fabian Florin (41) da Cuera, da procurar per quei maletg ei plitost ina casualitad: «Igl emprem havevan nus l’idea da far in’installaziun visuala cun beamer. Spert havein nus lu denton viu che quei ei fetg car. En contact cun glieud da quei sectur essan nus lu vegni attents sigl artist Bane.»
Lez ha applicau sia filosofia d’in maletg el spazi public. «Jeu sun selegraus da quell’incarica, hai vuliu crear enzatgei pil basegns dil publicum e hai lu patertgau sco visitader. Ils affons che vegnan el bogn duein adina seregurdar dils sujets ch’els han viu leu», di Bane. Il resultat da sias ponderaziuns ei in maletg en fuorma d’in graffitti cun in’atmosfera cun differentas spezias d’animals dall’aua, la dinamica e l’atmosfera dall’aua. Igl ei in maletg dinamic e tuttina cun in effect quietont. L’ovra ha el realisau cun sustegn dils dus artists da graffitti Tank e Tino . «Graffitti ei in stil da s’exprimer e malegiar ch’ei naschius ella cultura dil hop-hop», di Bane.
Ovras sigl entir mund
Il maletg el Bogn Sedrun ei in da biars projects che Bane ha realisau ils davos 13 onns. La gliesta dad ovras surtut egl exteriur ei liunga e tonscha dalla Corea dil Sid entochen la Grecia, China ed ils Emirats Arabs Uni. Mo era en Svizra porta bein enqual lavur sia nodacasa, aschia era ina vid in sutpassada a Laax. Pliras ovras ch’el ha realisau han ina surfatscha d’entochen 1000 meters quadrats. En cumparegliaziun cun lezzas ei quella da 160 meters quadrats el Bogn Sedrun plitost ina pintga. «Tuttina, ella ei ina bumba. Jeu sun fascinaus dil resultat final», di Bane.
La moda da s’exprimer en fuorma da graffitti pretenda ina tecnica speciala. «Nus luvrein buca cun penel. Cun lez eis ei buca pusseivel da contonscher quei effect. Per nossa tecnica ei colur da spray la dretga varianta», di Bane. Dil reminent: Il num Bane ha Fabian Florin eligiu suenter esser staus dependents da drogas: «Bane ei il plaid per ina smaledicziun, gie per ina pestilenza, per in tissi. Suenter ch’jeu sun staus deliberaus dallas drogas sun jeu sedecidius per el sco memorial, sco muossadet.» Ils visitaders futurs dil Bogn Sedrun astgan selegrar da si’ovra che vegn presentada alla publicitad il di dalla reavertura. Quei maletg cumpletescha l’infrastructura renovada e modernisada dil Bogn Sedrun en ina moda e maniera captivonta.