Foto MAD / fmr abc
Al turnier da notg 2024 dils Desertina Bulls a Mustér ein 19 equipas cun bien 145 giugaduras e giugadurs separticipai. La cumpignia suenter il turnier s’auda tier quell’occurrenza.
Gl’onn 1992 ha il club fixau ses statuts e cunquei entschiet a scriver sia historia: Ils 25 d’avrel da quei onn han amaturs dil sport da unihockey fundau igl UHC Desertina Bulls. Il club ei daditg s’etablius culla scursanziun «Desertina Bulls». E lezs s’audan daferton tier las fermas uniuns sportivas en Surselva.
Buca mo l’ambiziun sportivaCuort suenter la fundaziun ha l’uniun entschiet ad organisar in’occurrenza attractiva. Cu exact ch’il turnier da notg ei staus l’emprema gada sa il president actual Adrian Flepp buc. El ei denton fetg satisfatgs dall’ediziun 2024 ch’ei stada sonda vargada. «Nus vein giu super, in eveniment grondius eis ei puspei stau», ha el detg sin damonda dalla FMR. 19 equipas dalla Cadi e dalla Foppa, duas dameins ch’igl onn vargau, eran s’annunziadas, diesch dad umens e nov da dunnas. Mintgamai treis giugaduras ni giugadurs plus goli han formau ina equipa.
Il turnier da notg ha entschiet allas 17.00 culla prerunda. Rodund 145 giugaduras e giugaduras han entschiet, ventireivlas finalistas e finalists han finiu ils giugs el decuors dalla «notg». Rodund 150 aspectauras ed aspectaturs han gudiu giugs fairs e plein tensiun ella halla dil Center Fontauna. Tier las dunnas ha la gruppa Ambri Bugliottas gudignau il turnier da notg 2024, avon Las Resgias e Las Pentapas. Tiels umens ei la gruppa dalla Svizra orientala cul num Ostschwizo vegnida tiarza. La secund-megliera equipa ei la Bunker Crew e gudignau il turnier da notg 2024 dils umens ha la gruppa «Bambellas 2.0» Sco usitau tier quell’occurrenza, ei buca mo l’ambiziun sportiva, mobein era la cumpignia stada el center. Quei han participontas e participonts fatg ensemen cul publicum sil plaz avon la halla – nua ch’igl era bi frestg. La biala sera da fin stad ei stada adattada per festivar ils victurs ed insumma il turnier da notg dils Desertina Bulls.