Quotidiana dils 15.10.2024 | Hans Huonder
La tiradura Annina Tomaschett da Trun sa festivar in ulteriur bi success. La dumengia ha ella gudignau il final dil «shooting masters» dallas dunnas a Näfels.
Otg ga per onn semesiran las meglieras tiraduras ed ils megliers tiradurs dalla Svizra a concurrenzas dil «shooting masters». Quei succeda ton culla buis d’aria sco cul caliber pign. Las meglieras otg ed ils megliers otg da mintga categoria absolvan allura ils finals. En quels siettan las otg meglieras tiraduras ed ils otg megliers tiradurs digl onn da lur categorias mintgamai duas serias a mintgamai tschun siets. Silsuenter vegn sittau mintgamai dus siets e quella e quel culs pli paucs puncts croda ora entochen che las duas meglieras ed ils dus megliers absolvan il final. Quei sistem procura per tensiun, era pils aspectaturs.
Ils finals han giu liug la davosa fin dall’jamna a Näfels. Ella categoria dall’elita dallas dunnas ei Annina Tomaschett ida culla plema. Ella ha gudignau la concurrenza cun in avantatg da 0,5 puncts sin Muriel Züger . In 9,9 cul davos siet ha tunschiu ad Annina Tomaschett per la victoria. Sco premi ha ella retschiert – sco las ulteriuras victuras ed ils ulteriurs victurs da categoria – ina buis da caliber pign dalla marca Walther. La marca da buis Walther ei ina dallas pli enconuschentas mundialmein. Per Annina Tomaschett ei quei stau l’emprema victoria al final dils masters. (fmr/hh)