Dals 25 da november fin ils 10 da december 2024 han lieu en il Grischun numerusas occurrenzas ed acziuns en connex cun ils «Dis d’acziun cunter violenza a chasa». Sco quai ch’il Chantun scriva en ina communicaziun a las medias, po mintgin da nus esser pertutgà da violenza a chasa. Per sustegnair las persunas ch’èn pertutgadas da violenza sin lur via en ina vita senza violenza saja impurtant, che las purschidas d’agid e da sustegn sajan enconuschentas ad ina vasta publicitad. Durant ils dis d’acziun mettan differentas organisaziuns ed instituziuns en l’entir chantun Grischun in signal cunter violenza a chasa. Planisadas sajan occurrenzas multifaras, sco preschentaziuns da films, concerts, installaziuns d’art e da glisch, exposiziuns, occurrenzas da benefizi, stans d’infurmaziun e teaters d’improvisaziun. Plinavant dattan rundas da discussiun suenter intginas occurrenzas l’occasiun da sa barattar e discutar davart il tema. La populaziun saja envidada da sa participar a las occurrenzas, scriva il Chantun. En connex cun violenza a chasa datti mintg’onn var 20 000 malfatgs en Svizra, mazzadas vegnan en media 25 persunas, hai num en la communicaziun. (cdm/fmr)
* Il program detaglià ed ulteriuras infurmaziuns èn da chattar sut