Text: RTR/FMR | Foto: US Drug Enforcement Administration
La droga sintetica fentanil è uschè privlusa sco nagin’autra. En ils Stadis Unids ha la droga gia chaschunà 100 000 morts. Era a Turitg ed en il Grischun èn gia vegnids constatads singuls cas da fentanil, maschadà cun autras substanzas. Il president da la regenza grischuna, Marcus Caduff , di che la droga vegnia baud u tard era a sa derasar en Svizra. En il chantun Grischun e la citad da Cuira èn ins vid coordinar e trair mesiras. Tenor Marcus Caduff vulan ins tranter auter investir en la prevenziun, sensibilisaziun e l’infurmaziun en ils circuls pertutgads. Era tests da drogas, che san intercurir sch’igl è fentanil en substanzas èn ins vid organisar.
Fentanil è atgnamain in med encunter il mal, igl è dentant in analgetic narcotisant fitg ferm. Atgnamain èsi in med opioid che vegn duvrà en la medischina suenter grevas operaziuns ubain tar pazients da cancer en il stadi final. Fentanil fa vegnir spert dependent, perquai che la substanza ha in effect ch’è 50 giadas pli ferm che quel da heroin e 100 giadas pli ferm che quel da morfin.
En ils Stadis Unids ha la droga gia chaschunà plirs 100 000 morts. Perquai è la droga vegnida classifitgada en ils USA sco ina da las drogas las pli mortalas. Gia mo ina dosa uschè gronda sco in piz dad in rispli (2 milligrams) po esser mortala.
Fentanil sa lascha producir fitg simpel e custa pli pauc per la producziun che autras drogas. Perquai è la droga fentanil daventada attractiva sin la fiera. La substanza vegn savens dentant era nizzegiada per stender autras substanzas.
Entir artechel: mira sut