Quotidiana dils 11.09.2024 | (cdm/fmr)
Digl emprem entochen ils 8 da settember 2024 han giu liug el stan da tir da Guntelsey a Thun ils campiunadis svizzers da tir cun buis e pistola. En 43 concurrenzas ein las campiunessas ed ils campiuns vegni erui. Las tiraduras ed ils tiradurs dil Grischun han contonschiu tschun plazs da podest e nov plazs finals cun diplom. El match da duas posiziuns culla buis d’assagl 57 sur la distanza da 300 meters ei Norbert Caviezel da Cuera daventaus campiun svizzer. Ella disciplina olimpica culla buis sur 50 meters ha Alicia Beer da Rueras contonschiu il tierz rang. Quei rang da bronz ei reussius alla Tuatschina el match en venter dallas junioras e dils juniors sut 13, respectiv 17 onns. Entgins dis avon haveva ella contonschiu il quart rang el match en treis posiziuns. Rangs da diplom a quels campiunadis svizzers han Annina Tomaschett da Trun ed Yvonne Margreth da Castrisch contonschiu els finals cun buis sur la distanza da 50 meters.