La fontauna da Brabo | Il herox d’Antwerpen
Dils 5 entochen ils 12 d’october 2024 ha il Camp Cadi per giuvenils giu liug danovamein en Belgia. 40 giuvenils naven da Trun tochen Rueras ein separticipai e gia per la tschunavla ga essan nus stai ad Antwerpen, il marcau cultural dalla Belgia.
La tensiun ei stada gronda cu nus essan semess sin via cun Viadis Christoffel da Riein la sonda baul la damaun encunter Cuera e Basilea, lu Strassburg e Luxemburg per arrivar la sera allas sis ad Antwerpen. En sesez fuss il temps da viadi staus pli cuorts, mo las colonnas d’autos usitadas han caschunau in retard da bunamein duas uras. Tuttina ein tuts stai cuntents dalla buna tscheina ed era leds da finalmein esser el liug destinau.
La dumengia endamaun da bialaura havein nus lu per l’emprema gada fatg ina tura tras il bi marcau dad Antwerpen ed era visitau il museum da tschugalata. Omisduas aventuras han fatg impressiun ed ils Svizzers han empriu ch’era ils Beltgs san far buna tschugalata, gie schizun ch’els ein ils pli gronds producents dil mund. Tschugalata, uaflas e pommes frites han lu era accumpignau nus tras l’entira jamna e nus savein uss danunder che quellas specialitads derivan.
Visetas ed excursiuns
Spel marcau ad Antwerpen havein nus era visitau ils camps d’uiara ad Ypres, in’excursiun che ha fatg gronda impressiun, lu la capitala Bruxelles cun ina viseta el parlament europeic e dil marcau. Il mardis ei staus reservaus per admirar la Mar Atlantica e degustar ils pèschs frestgs dad Oostende. Ils vivs vein nus lu viu in di pli tard en Hollanda a Neeltje Jans, nua ch’ei vegn era fatg forza electrica cull’aua dalla mar e regulau l’altezia dall’aua ella tiara, aschia che grondas parts dalla Hollanda sesanflan schizun sut il nivel dalla mar. Ina tura atras il port da mar ad Antwerpen ed ina gronda tura tras las stizuns dil marcau han terminau il camp 2024. Excepiu d’in virus che ha attaccau treis participontas ei tut reussiu sco planisau e cuntents essan nus lu era returnai, schazegiond che a casa eis ei aunc adina il pli bi. Forsa ch’in ni l’auter lai encrescher pils giugs dalla sera, per la buna cumpignia ed ils bials e leghers muments, mo las bunas regurdientschas restan.
2025 a Paris
La fin dil camp munta pils menaders gia l’entschatta dil niev camp 2025 che meina puspei a Paris. Las annunzias san gia vegnir fatgas proximamein sut campcadi.ch. Nus engraziein alla Fundaziun Tür auf – mo vinavon, allas pleivs dalla Cadi e tuts sponsurs che possibiliteschan quell’jamna da sentupada pils giuvenils.
Camp Cadi, menadras e menaders