Questa primavera ha Remy Manetsch fatg furore cun siu hattrick enteifer quater minutas el giug dalla 3. ligia da Schluein Glion encunter Triesenberg. Il giuven giugadur da ballapei da Mustér ha igl instinct da sittar gols ed in’ulteriura buna qualitad ei sia spertadad. Quella nezegia el ussa era per sepreparar per in temps da scola e ballapei els Stadis Uni dall’America.
Hans Huonder/FMR
Dalla 3. entochen la 7. minuta dil giug da 3. ligia da Schluein Glion encunter Triesenberg ha Remy Manetsch sittau treis gols. Treis gols en seria en ina mesadad dil giug ei in hattrick classic. Ed el ha dabia muntada per in giugadur, era per Remy Manetsch (19): «Quei giug vegn jeu segir mai ad emlidar.»
Iu tut fetg spertSuenter siu temps da junior en teams dalla Cadi e dalla Surselva ei Remy Manetsch setschentaus tier l’Uniun sportiva Schluein. Parallelmein sper siu engaschament ella squadra da juniors A dalla Surselva eis el vegnius integraus successivamein ell’emprema equipa da Schluein Glion: «La stagiun passada ei stada l’emprema ch’jeu hai saviu dar regularmein 3. ligia. Igl ei en sesez iu tut fetg spert.» Sis gols ha el marcau, treis pia en in sulet giug. Ch’el ha fatg la midada dil Club da ballapei Sedrun/Mustér tier Schluein Glion ha surtut in motiv: «Ellas equipas da juniors hai jeu dau ballapei cun biars dalla Foppa. Els ein oz buns collegas. In auter motiv ein las bunas cundiziuns tier Schluein Glion.» La stagiun vegnenta ei Remy Manetsch aunc da veser ell’equipa da Schluein Glion, silsuenter buca pli per in temps.
«Nezegiar la caschun»«Suenter in giug culs juniors A ordeifer encunter Tobel/Affeltrangen sun jeu vegnius contactaus d’ina agentura da giugadurs. Quella intermediescha giuvens giugadurs en scolas dils Stadis Uni dall’America culla caschun da saver sescolar e dar ballapei leu», di Remy Manetsch. Suenter plirs discuors seigien el e ses geniturs sedecidi per quella caschun: «Per mei ei quei ina schanza unica ed jeu less buca far a memez la renfatscha in di ch’jeu hagi buca nezegiau quella.» En sesez levi el serender gia questa stad ell’America, mo igl emprem hagi igl emprendissadi sco dessignader da construcziun aulta tier Spacial Design a Trun stuiu sut tetg. Quel ha Remy Manetsch terminau definitivamein il venderdis vargau culla surdada dil diplom. Avon che far il viadi els Stadis Uni dall’America en in onn suonda quest onn aunc igl engaschament ella protecziun civila: «Quel absolvel jeu en ina scola-dimora per giuvenils a Cuera duront sis meins.»
Sescolar e trenarNua ch’il viadi meini el ell’America sa Remy Manetsch aunc buc: «Quella decisiun hai jeu aunc buca priu, mo miu giavisch fuss la costa dil vest dils Stadis Uni.» Leu vegn el ad absolver ina scola che porscha ad el la caschun da seperfecziunar egl engles, mo era en roms che vegnan dabien a sia professiun. Leu vegn denton era dau ballapei: «Jeu vegn a dar leu il campiunadi dallas equipas cun giugadurs sut 23 onns. Igl ei in campiunadi da differentas categorias da fermezia dallas scolas. Las meglieras dils Stadis Uni semesiran all’ura en giugs finals per eruir ils campiuns.» Il giuven giugadur da ballapei da Mustér vul sesviluppar sportivamein en quei temps e guder la bun’infrastructura che seporscha leu: «La spertadad e la cundiziun hai jeu, ussa ha ei aunc num luvrar per exempel vid l’atletica.»
Anavos ella regiunMalgrad quei temps che porscha ad el la caschun da far novas experientschas, patratga Remy Manetsch buca vid ina carriera da ballapei professiunala: «Gliez ei negin tema. Jeu less dar sin in bien nivel da 3. ligia ni in mument forsa era da 2. ligia, sche pusseivel cun Schluein Glion.» Aunc buca decidiu ei era, con ditg ch’igl engaschament da Remy Manetsch cuoza da l’autra vart dalla mar: «Quei sai jeu buca dir. Il maximum fuss quater onns, mo sch’ei plai buc a mi, sai jeu returnar gia suenter in onn.» En scadin cass selegra Remy Manetsch da quei che spetga sin el en in onn. Entochen che Remy Manetsch sa far quell’experientscha eis el aunc da veser la stagiun vegnenta ella 3. ligia cun Schluein Glion. E tgisà, forsa serepeta siu grond success cul hattrick el giug encunter Triesenberg beinspert.