Davina Andrea Deplazes è la pli giuvna artista che ha survegnì il premi «Solo». L’artista da Surrein po exponer fin ils 16 da favrer en il Museum d’art a Lucerna. La FMR ha visità l’exposiziun che mussa ina nitschola giganta – ed ha discurrì cun la curatura.
Claudia Cadruvi/FMR
La stanza ha insatge divin. Forsa èsi la colur grisch stgira da las paraids, forsa ils dus relievs da marmel, forsa la sculptura misteriusa che penda giu dal palantschieu sura. lls trais objects gronds ed ina seria da pitschnas plattas-crap stgaffeschan ina tempra ruassaivla.
Davina Andrea Deplazes (25) ha pudì crear las ovras aposta per l’exposiziun en il Museum d’art a Lucerna. Ella ha numnadamain gudagnà il premi «Solo» che vegn surdà mintg’onn ad in artist u in’artista che viva en la Svizra Centrala u deriva da là.
Marmel fraid u taila loma
Ils dus relievs da marmel mussan structuras vesaivlas gia da lunsch. Èsi structuras figurativas? Cun s’avischinar al reliev è da vesair ina surfatscha elavurada – fins musters repetitivs. Els stgaffeschan l’impressiun ch’il reliev na consistia gnanc da crap, mabain da palpiri, da tocca da taila, d’insatge lev.
I fa quaida da palpar per sentir, sch’il reliev è propi da crap ubain da taila. Ma en in museum èsi scumandà da tutgar ils objects. Las mirveglias èn svegliadas. Ha l’artista stgaffì da gugent quest effect? Scleriment dat in sguard en ina communicaziun che descriva in’ulteriura exposiziun da l’artista a Lucerna. «Finezia e direzia» è il titel sursilvan da lezza exposiziun ch’è stada averta il november e december en il «sic! Elephanthaus». «Il fin, lom e tener è in tric, in rampign, in inschign artistic», explitgescha la communicaziun. Davina Andrea Deplazes regordia al fatg che l’esser sa cumponia d’ina maschaida dal «Tener e dal dir. In sper l’auter. In en l’auter».
Sculptura plain forza
Enavos en la stanza dal Museum d’art a Lucerna: L’object principal evochescha anc dapli dumondas ch’ils dus relievs. Ina sculptura dad aluminium penda dal palantschieu sura. Or da l’aluminium sa stroclan furmaziuns da vaider turbel. La sculptura exprima ina forza che dominescha la stanza. Èsi ina sculptura abstracta u figurativa?
Ella saja inspirada d’ina frastga cun trais nitscholas, stat scrit en l’entruidament dal museum. Ils fritgs na sajan però betg nuschs, mabain vaider stgaffì tenor la furma da vestgadira u tailas. «Scorsas» è il titel da l’ovra.
Nitschola e Tschenderletga
Susanne Gerber ha tegnì la laudatio a chaschun da l’avertura da l’exposiziun. La curatura dal museum d’art a Lucerna ha dà intgins indizis co che l’ovra saja da chapir. Da l’archeologia sappian ins ch’ils umans hajan gia mangià en temps preistorics nitscholas, ha explitgà Susanne Gerber en sia laudatio. Nitscholas sajan da vegl ennà in fritg plain simbolicas – per ils vegls druids celtics in simbol per sabientscha. En la paraula da la Tschenderletga fetschian las trais nitscholas pussaivel che la protagonista possia mitschar vestgida sco um. La nitschola da Davina Andrea Deplazes regordia a tut quests elements e reflecteschia a moda critica la funcziun da la scorsa, da paletschas per sa travestgir e sa zuppar, ha ditg Susanne Gerber: «Or da las diras crosas culadas dad aluminium creschan fritgs da vaider sco identitads fluidas che tschertgan ina via or da la scorsa steria.»
«Artista fitg curaschusa»
La curatura ha accumpagnà la lavur da Davina Andrea Deplazes per questa exposiziun ed è tut inchantada: «Ella è ina artista fitg curaschusa. Ella ha il curaschi da sa deditgar a tecnicas u da tscherner material, nua ch’il process d’emprender è enorm grond.» Uschiglio sa fatschentian giuvens artists savens cun tecnicas tradiziunalas e sa nuspeschian da lavurar cun grond e grev material. Davina Andrea Deplazes emprendia da cular aluminium, da suflar vaider e n’haja nagin starment da sculpturar marmel. «Ella ha il basegn dad empruvar ora tut», di Susanne Gerber.
Cun il premi «Solo» porschia il Museum d’art a Lucerna mintg’onn ad in artist u in’artista in’exposiziun singula cun cussegliaziun ed accumpagnament durant l’entir process da stgaffir las ovras. La finamira saja che artists u artistas emprendian co ch’ins sa preparia sin in’exposiziun, fetschia reclama, procuria per sponsurs ed exponia ils objects, di Susanne Gerber. La curatura ha accumpagnà Davina Andrea Deplazes tras quest process ed è impressiunada: «Ella è la pli giuvna premiada che ha survegnì fin ussa quest premi. E ditg sincer, jau l’avess era simplamain pudì laschar lavurar persula ed i fiss gartegià.»
* L’exposiziun «Solo» dura anc fin ils 16 da favrer en il Museum d’art a Lucerna che sa chatta gist sper la staziun principala. Las ovras èn venalas.
Artista da Surrein fa strada
Ella ha 25 onns ed ha fatg gia set exposiziuns singulas. Per l’exposiziun actuala cun in’atgna stanza en il Museum d’art a Lucerna ha ella stgaffì trais objects gronds ed ina seria da pitschnas plattas-crap. Davina Andrea Deplazes è creschida si a Surrein. Ella ha fatg la matura bilingua a Cuira. L’onn 2023 ha ella terminà ses studis dad art a Turitg e Lucerna cun il Bachelor of Arts en design da products. Durant il studi ha ella anc absolvì praticums en la «Kunstgiesserei» a Son Gagl u tar «Glassworks Studio» a Berlina. L’artista viva e lavura a Lucerna. (fmr/vi)