L’elecziun dalla professiun ei in dils emprems pass impurtonts ella veta d’in giuvenil. Egl internet datti biaras purschidas per eruir la dretga clamada. Mo en lungatg romontsch datti buca biaras da quellas purschidas. L’interpresa Profolio, ina pintga interpresa privata svizra, vul midar quei. Profolio ha translatau la purschida digitala per las scolas en rumantsch sursilvan.
RTR/FMR
Simon Schmid meina l’interpresa Profolio ch’ei vegnida fundada da siu bab avon 40 onns a Bülach/Turitg. Simon Schmid che meina la Profolio en secunda generaziun, ha introduciu las purschidas digitalas ed ha actualisau meds d’instrucziun. Duront ina viseta ell’Engiadina ha Simon Schmid discussiunau cun auters cussegliaders da professiun davart la situaziun dal rumantsch per l’elecziun dalla professiun. Ils resuns ch’el ha survegniu: Egl internet detti ei bein pliras purschidas per sedecider per la dretga professiun. Quei che maunchi seigi denton ina purschida per romontsch.
«Siemis ston ins viver el lungatg matern»Perquei ei Simon Schmid sedecidius da translatar il mied d’instrucziun per l’elecziun dalla professiun el quart lungatg naziunal. «L’elecziun dalla professiun ei in fetg impurtont mument da mintga giuvenil», di Simon Schmid. «Tgei habilitads hai jeu? Tgei viel jeu? Co vesa mia veta professiunala ora a pli liunga vesta? Quei ein damondas che mintga giuvenil fa duront l’elecziun dil mistregn», di Simon Schmid envers RTR. «Nus vulessan animar ils giuvenils da viver lur siemis, d’haver visiuns. Quei sto en mes egls succeder el lungatg ch’ins viva e discuora el mintgadi.»
All’entschatta ha il cantun refusauL’emprim hagi il cantun buca vuliu, di Simon Schmid. Pér cun in concept ed igl agid da la Lia Rumantscha seigi semussau ch’il mied d’instrucziun professiunal duessi tuttina vegnir translataus, e quei per inagada en sursilvan. «Quei ei ussa succediu. Ussa suonda la tscherca dallas scolas che drovan il mied.» In mied d’instrucziun drovi scolas che utiliseschian el, di Simon Schmid. «Perquai hai jeu visetau la Conferenza generala sursilvana. Leu ei igl interess pil mied d’instrucziun staus fetg gronds.» Ils 12 da zercladur 2024 vegni ei a dar in secund inscunter per tut ils interessai che hagi liug a Trun. Leu vegni la purschida romontscha per l’elecziun dalla professiun mussada a tut ils interessai, di Simon Schmid. «Ultra da quei havein nus previu da far ina scolaziun supplementara per la magistraglia. Mia speronza ei che nus vegnien da gudignar ulteriuras scolas per nossa purschida per l’elecziun dalla professiun.» Entochen oz ein quei duas scolas romontschas sursilvanas che drovan il mied per eleger la clamada per romontsch.