A Cuira èn pliras persunas vegnidas testadas positiv sin Fentalin, in opiod fitg potent e privlus. Ils responsabels da la citad na fan dentant nagins quitads.
RTR/FMR
Fentanil è in medicament encunter il mal che vegn dentant er duvrà sco droga. La droga sintetica vegn fimada, traguttida u tratga si cun il nas. En ils Stadis Unids hai dà ina vaira epidemia da dependenza da la droga cun dieschmillis morts mintg’onn. Uss datti indizis che la droga è arrivada er a Cuira. Quai conferma il suprastant da la citad Patrik Degiacomi vers RTR: «Nus avain chattà en l’aua persa da Cuira restanzas da Fentalin. L’ambulatori Neumühle ha lura era testà pliras persunas positivamain sin Fentalin.»
Fentanil ei 50 fin 100 giadas pli ferm che Heroin
Concret han tschintg consuments e consumentas da drogas gì in resultat positiv suenter far in test d’urin, di Margrith Meier , la manadra da l’ambulatori dals servetschs psichiatrics dal Grischun. Probablamain hajan els dentant consumà questa droga senza insumma esser conscients ch’els fetschian quai. «Tuttas tschintg persunas han ditg a moda vardaivla ch’ellas n’hajan betg cumprà Fentalin. I sto damai esser insanua quella substanza en circulaziun ch’ins ha maschadà tiers autras substanzas», uschia Margrith Meier. «Fentalin è in opiod fitg potent. El è 50 fin 100 giadas pli ferm che heroin e fa vegnir fitg svelt dependent cun gronds donns fin a la mort.» Co precis che la droga saja arrivada enfin a Cuira na sappian ins anc betg, di Patrik Degiacomi. I vegn sminà ch’il Fentanil vegnia pli populars perquai ch’i saja ina droga simpla ed bunmartgà da producir. Ch’ins stoppia uss quintar cun circumstanzas dramaticas sco en ils Stadis Unids, dubita Margrith Meier da l’ambulatori dentant: «Igl è impurtant che nus persunas spezialisadas restian en il discurs cun la glieud ed infurmian ch’insatge fitg privlus saja en circulaziun.» La Svizra haja plinavant bler savida ed experientscha co tractar persunas dependentas d’opiats ed uschia sajan ils experts ed expertas preparadas bain.