Hans Huonder/FMR
Dil venderdis entochen la dumengia vargada ha giu liug ad Amsterdam il campiunadi mundial da powerlifting. En treis disciplinas d’alzar peisas ein las campiunessas ed ils campiuns vegni erui. Suenter siu emprem tetel da campiunessa mundiala igl onn vargau a Sardinia, ei Gina Berther (29), oriunda da Rueras, danovamein separticipada e quella ga ella rolla dalla favorita. Ed ella ha fatg tutta honur a quella rolla e recaltgau aur ellas discplinas d’alzar sur la crusch ed ord la schanuglia. Cumpletau quellas duas victorias ha ella cul secund rang d’alzar la peisa giu dil baun. Gina Berther ha concurrenzau ella categoria entochen 70 kg ed ei cuntenza cun sia prestaziun: «Cullas prestaziuns ils emprems dus dis sun jeu fetg cuntenza. Culla concurrenza d’alzar sur la crusch la dumengia sun jeu buca dil tut cuntenza, malgrad igl emprem plaz.» En quella disciplina ha ella contonschiu igl onn vargau il record mundial da sia categoria da 195 kg. La finamira era d’alzar uonn 200 kg: «Jeu hai fatg il meglier pusseivel, mo igl avegnir less jeu mussar tgei che mias combas pon propi alzar.» Els trenaments ha ella alzau gia pliras ga 200 kg. Suenter quei grond success gauda ella ussa entgins dis da vacanzas a Rueras, avon ch’ei mondi puspei el Valleis vid la lavur sco vendidra d’immobilias ed ils trenaments el center da fitness.