Foto e film ei stau il program da quest’jamna dalla secunda classa dil gimnasi a Mustér. El rom dall’jamna da focus ein 12 scolaras e scolars sefatschentai dil formar ed editar fotos e films. Kai Kremser ha instruiu la classa, mo era schau bia spazi per esser creativs allas studentas ed als students.
Pauc ei oz pli sempel che da fotografar e filmar. Ferton ch’ei duvrava persuenter ina camera aunc avon paucs onns, porschan ils telefonins quellas pusseivladads oz. La qualitad, che quels apparats han, ei buna, silmeins pigl album da famiglia ni per transferir las registraziuns sin plattafuormas dallas medias socialas. Mo tuttina ei fotografar e filmar buca semplamein fotografar e filmar. Tgi che vul in bien product, sto buca mo haver igl egl persuenter, mobein era enconuschienschas dallas pusseivladads tecnicas e las reglas da formaziun dil maletg.
Foto e film el focus
12 scolaras e scolars ella vegliadetgna da 14 onns dalla secunda classa dil gimnasi a Mustér ein seprofundai quest’jamna – l’jamna da focus (mira box) – el tema foto e film. Kai Kremser ch’ei oriunds d’Ahlen en Germania ha accumpignau els. El ha studegiau fotografia e meina in’agentura da reclama e grafica. Igl ei la quarta ga ch’el instruescha quei tema a Mustér: «Era uonn sentel jeu il bien spért dalla classa. Talas jamnas da focus colligian e promovan la lavur el team. Igl ei bi da mirar co ils giuvenils lavuran e s’interesseschan.» Il plascher da far bunas fotos e films seigi ina dallas finamiras da quell’jamna da focus: «Impurtont eis ei en mintga cass che las studentas ed ils students hagien buca liunguriala.» (Mira era box.)
Risguardar reglas ed esser creativs
In program per quell’jamna da foto e film ha ei bein dau, mo Kai Kremser di: «Ei dat aschidadir in fundament da savida e quel less jeu intermediar. Mo duront in’jamna sco quella cheu less jeu era dar la pusseivladad d’esser creativs allas scolaras ed als scolars.» Fundament da savida ei per Kai Kremser per exempel la tecnica digl appa-rat e dils programs d’elavuraziun da foto e film, mo era la formaziun dil maletg. Mo lu era entginas reglas, per exempel tgei che duei vegnir publicau ni buca.
Tgei vi jeu mussar?
«Mintgin sto sedumandar: Tgei vi jeu mussar e tgei ei impurtont? Quei ein damondas era dall’etica», di Kai Kremser. Luvrau han las scolaras ed ils scolars quell’jamna vid sujets per fotos e films. Aschia ei in di vegnius dedicaus al portret da persunas. In auter di han els produciu films. Quels ein lu vegni cumpletai cun tun entras scolaras e scolars dalla tschunavla classa che han giu il tema musica da film. Mo lu han ellas ed els era empriu co editar fotos e films. Quei ei pusseivel oz cun agid da differents programs per exempel sil laptop. Las pusseivladads persuenter ein bunamein senza cunfins.
«Saviu emprender bia»
L’jamna da focus ha dau allas 12 scolaras e scolars dalla secunda classa dil gimnasi da Mustér ina nov’investa en tecnica e reglas da fotografar e filmar. Il program che Kai Kremers ha purschiu ha plaschiu.
Bastian Eikens da Mustér:
«Jeu fetsch magari fotos e films en miu temps liber. Ell’jamna da focus hai jeu denton saviu emprender bia da quei ch’jeu savevel buca, sco per exempel editar meglier fotos e films. Jeu hai saviu seperfecziunar ella tecnica, per exempel era co luvrar cun cazzolas per far videos.»
Riccardo Job da Blinzuna:
«A mi plai quell’jamna speciala fetg bein, surtut era da luvrar sco team. Jeu sun buca sedaus giu fetg cun fotografar e filmar entochen ussa, mo igl avegnir savess quei semidar sin fundament da quell’experientscha.»
Fabio Cathomas da Breil:
«Jeu hai plascher da quella tematica. Sch’jeu fotografavel zatgei, lu plitost la cuntrada ni il tschiel. El temps liber mon jeu denton pli bugen a dar ballapei ni cun skis che da fotografar e filmar.» (fmr/hh)
Differents temas
Duas ga per onn – la primavera ed igl atun – porscha il gimnasi dalla claustra a Mustér in’jamna da focus. En quellas tractan las scolaras ed ils scolars differents temas. All’jamna da focus actuala ei l’emprema classa sefatschentada dallas fontaunas, la secunda da foto e film, la tiarza dil romontsch e la quarta dalla religiun e l’etica. La tschunavla classa ha giu sco tema la musica da film respectivamein la formaziun grafica ed ina part dalla sisavla ei sefatschentada dil romontsch. Per quei intent eis ella ida sin viadi tiels Romontschs ell’Engiadina e las Dolomitas.
In’autra gruppa dalla sisavla classa ei serendida ella Svizra franzosa per ir leu sils fastitgs da gliez lungatg. Sco pader Paul Tobler , magister al gimnasi di, dumbra la scola media a Mustér il mument 135 scolaras e scolars. (fmr/hh)