El seigi in dils davos dus rappers romontschs dil mund – quei pretenda Ivo Orlik alias Giganto sez. Ella tradiziun da cumponistas e cumponists romontschs eis el semess sin viadi or el mund per anflar siu niev stil musical – anflau ha el quel a Berlin ensemen cun in producent engiadines.
RTR/FMR
Suenter ils emprems pass sco rapper sigl album «G-Punct», collavuraziuns cun Mattiu Defuns , e proxims pass sco artist da solo sin «Sault d’amur» entochen l’EP dubla da 2023 «L’alva nera», ha Ivo Orlik , alias Giganto adina puspei demonstrau differentas fassettas. Las empremas canzuns eran per part pli provocativas cun diversas collavuraziuns. Pli tard hai dau canzuns en direcziun pop, pli adattadas per famiglias (per exempel «Mumma» cun Mattiu Defuns). Cul secund album da solo «Sault d’amur» ei era la provocaziun turnada – canzuns sco «Tgil blut» han procurau per lingias grassas era sur cunfins grischuns ora. Cun l’EP dubla «L’alva nera» ei Giganto daventaus in tec pli moderns e carschius.
Quei cuntinuescha uss era sin l’EP actuala «Berlin&Retour». Per producir quella ha el collavurau cun il producent Jan Pinggera ch’ei oriundamein da Scuol e habitescha e lavura uss a Berlin. Musicalmein sepresenta la platta aunc pli electronica – per part cun beats pulsonts che fan endamen musica da tecno. Segiramein ei quei era l’influenza da Berlin che vala buca mo sco in Mecca dil tecno mobein ch’ei er in marcau che dorma mai. Tschun canzuns inclusiv versiuns instrumentalas ha la nova EP registrada a Berlin.
Temas e musica sco ei plai«Berlin&Retour» seigi in project naschiu senza squetsch commercial e cun musica che dueigi cunzun plascher a Giganto sez. Era tematicamein tracta il rapper patratgs ch’han fatschentau el duront siu temps ella capitala tudestga: Consum, relaziuns, fiastas, amur, differentas culturas ed ils sentiments freids en marcaus gronds.
Pli baul ein biars Romontschs – sfurzadamein ni da libra veglia – semess sin viadi ed ein turnai cun novas ideas. Era Giganto ei turnaus cun ideas frestgas e vitier in stil niev, electronic e modern. Ei seigi plitost musica per pissiunai da musica cun plascher vid experiments. «Igl ei semplamein buc aschi studiau atras, tgei ch’ei ni perfetg pil radio, ni per survegnir grondas cefras sin spotify», di Giganto ad RTR: «Jeu hai semplamein fatg quei che fa plascher a mi, e gliez ei precis quei stil.» Tuttina reflecteschan las canzuns musicalmein ina tendenza ella scena da rap dalla Tiaratudestga. Il cuntegn elavura las experientschas dil rapper e tematicas actualas. Sche igl album dad Orlik «G-Punct» era aunc il scolaret cun ideas balurdas, plein colurs e senza gronds quitaus, lura ei «Berlin&Retour» il student – pli madirs, pli clars, denton forsa era cun in tec pli pauc veglia da giugar. Manteniu ha el sia moda da scriver cun flows e remas semplas.