L’Uniun dil tir da sport grischuna ha eligiu Annina Tomaschett sco tiradura digl onn ed Alicia Beer sco megliera juniora. Per las duas Sursilvanas che sietan omisduas ella Societad da tir Voluntaria Trun ei quei ina honur ed in ulteriur success en lur aunc giuvnas carrieras.
Hans Huonder/FMR | Quotidiana dils 5 da mars 2025
Onn per honorescha l’Uniun dil tir da sport grischuna la megliera ni il meglier tiradur. Uonn croda quella honur sin Annina Tomaschett (24) da Trun. Dapi plirs onns eis ella ina dallas meglieras – per buca dir la megliera – tiradura dil Grischun. Consequentamein era ei mo ina damonda dil temps entochen ch’ella vegni undrada cul tetel «tiradura grischuna digl onn». Alla radunonza da delegadas e delegai dall’uniun la sonda vargada a Tavau ei denton aunc in’ulteriura Sursilvana vegnida honorada per sias prestaziuns. Alicia Beer (16) da Rueras ei vegnida festivada sco megliera juniora. «Quei ei ina gronda honur, jeu selegrel da quella. Igl ei aschidadir la pagaglia per bia lavur da trenament.» L’elecziun dallas meglieras ni dils megliers tiradurs succeda mintg’onn entras ina giuria dil fatg ed ina votaziun publica dalla Südostschweiz.
Records e tetels
Per la distincziun sco megliera tiradura grischuna ei Annina Tomaschett stada pli che madira. Igl ei buca stau l’emprema ga ch’ella ei stada nominada per quella honur. «Schegie ch’jeu sun era stada nominada quella ga, hai jeu buca quintau definitivamein cun quei premi. Jeu hai plascher da quella distincziun. Igl ei in mussament che la glieud sa giudicar tgei che sport d’elita vul dir, seigi pertuccont trenaments sco prestaziuns als tirs», di Annina Tomaschett ch’ei sco commembra dil cader naziunal era ambassadura pil romontsch ed il Grischun. Dapi il settember 2021 eis ella miez-profi da tir el center da prestaziun naziunal a Biel. Annina Tomaschett ha contonschiu quater records grischuns ed ei stada campiunessa svizra igl onn vargau. Agl ISSF Grand Prix ad Osijek en Croazia ha ella contonschiu igl onn 2023 la medaglia da bronz cul team svizzer.
En treis jamnas a DortmundIl tetel da campiunessa svizra silla distanza da 10 meters ha ella buca saviu defender la davosa fin d’jamna a Berna. «L’emprema passa ei stada treis puncts memia fleivla che normal. Ellas passas suandontas hai jeu buca pli saviu ulivar quei disavantatg», di Annina Tomaschett. La fin finala ei resultau il novavel rang. Sco otgavla fuss ella stada qualificada pil final. Buca cumpleinamein cuntenta eis ella culla stagiun vargada: «Entschiet haveva tut fetg bein culla victoria al shooting master. Silsuenter hai jeu fatg in experiment vid la buis. L’emprova ei denton buca secumprovada ed jeu hai cartiu memia ditg che quei vegni bien. Suenter la midada ein ils resultats puspei senormalisai.» En rodund treis jamnas sa Annina Tomaschett separticipar ad ina concurrenza internaziunala (ISAS) a Dortmund. Co ei va vinavon suenter cun tirs ei pil mument denton aunc buca clar. Prest entscheiva la stagiun da 50 meters. Quei ei la distanza preferida d’Annina Tomaschett ed en quella eis ella plazzada meglier ella rangaziun naziunala che en quella da 10 meters.
Scola e trenamentAlicia Beer che ha survegniu il premi sco megliera juniora dil Grischun la sonda vargada, ei dapi igl atun a Biel el center da prestaziun naziunal: «Miez di frequentel jeu la scola commerciala e miez di treneschel jeu.» Quater onns cuoza la scola da sport. Treis uras e mesa dedichescha ella mintgadi al tir: «D’ina vart ei quei secapescha il trenament el stan da sittar. Leutier s’auda denton era trenament da forza e mental.» Alicia Beer che sieta ensemen cun Annina Tomaschett culla Societad da tir Voluntaria Trun era il campiunadi da tir dalla ligia naziunala A, senta il progress ch’ella ha fatg dapi ch’ella trenescha intensivamein a Biel. «Jeu hai saviu migliurar ils resultats. Ussa sietel jeu ella media 620 puncts (60 siets), vul dir rodund tschun dapli ch’igl onn vargau», di la vicecampiunessa svizra dallas junioras digl onn 2024. Tuttina eis ella aunc buca cuntenta. «Las meglieras junioras dil mund sietan entochen 630 ni magari schizun 635 puncts. Quei ei era mia finamira», di la tiradura ambiziunada che ha la finamira da saver separticipar in mument ad in’olimpiada.
Pusseivladads da semigliurar
Potenzial da migliur vesa Alicia Beer aunc empau dapertut: «D’ina vart ei quei la prestaziun, da l’autra vart la concentraziun e la posiziun.» A concurrenzas internaziunalas da junioras e juniors a Luxemburg e Pforzheim en Germania eis ella vegnida da serangar denter las empremas 20. Profitar sa ella a Biel dallas trenadras e dils trenaders, mo lu era da contiraduras sco Annina Tomaschett e las campiunessas olimpicas Chiara Leone e Nina Christen . Spel tir e la scola gauda Alicia Beer il temps liber cun sunar clavazin e malegiar.
«Jeu hai plascher da quella distincziun. Igl ei in mussament che la glieud sa giudicar tgei che sport d’elita vul dir, seigi pertuccont trenaments sco prestaziuns als tirs.» Annina Tomaschett, tiradura
«Las meglieras junioras dil mund sietan entochen 630 ni magari schizun 635 puncts. Quei ei era mia finamira.» Alicia Beer, tiradura