L’emprema fin d’jamna dil november ha l’Uniun da gimnastica Cadi arranschau per l’emprema ga ina concurrenza da gimnastica d’acrobatica. Il success ei staus gronds. Ussa duein ulteriurs pass en favur da quei sport suandar. Sco Anja Klittich Berther, ina dallas responsablas, di, savess Mustér daventar in center regiunal da quei sport. En discussiun eis ei era da recepir quei sport ella Scola da talents Surselva.
Hans Huonder/FMR
Dapi entgins onns ei la scolasta da sport Anja Klittich Berther da Segnas engaschada sisum la Surselva ell’instrucziun da gimnastica artistica. Plirs onns haveva ella era l’idea da porscher gimnastica d’acrobatica, mo persuenter ha il temps muncau. «Avon dus onns ein Mikhail Semenov ed Irina Semenova dall’Ucraina vegni a Mustér. Els eran engaschai en lezza tiara ella gimnastica d’acrobatica ed aschia havein nus concretisau l’idea da porscher ensemen cun els quei sport era cheu tier nus», seregorda Anja Klittich Berther.
Gruppa cun 16 dels
Spert eis ei reussiu d’animar ina partida affons da far gimnastica d’acrobatica ed ussa dumbra la gruppa gia 16 dels dall’entira regiun. Avon rodund diesch dis han els giu la caschun da semesirar el Center Fontauna a Mustér cun gimnastas e gimnasts dall’entira Svizra. Quella concurrenza – numnada campiunadi grischun – ei stada in success. Per quei motiv duei ella lu era buc esser la davosa concurrenza a Mustér. «Nus lessen cuntinuar cul campiunadi grischun, respectivamein ulteriuras concurrenzas, forsa era internaziunalas in mument. Quei savess esser en in ritmus da mintgamai dus onns», di Sara Gadola-Cajacob ch’ei stada ensemen cun Anja Klittich Berther ed ulteriuras persunas el comite d’organisaziun dil campiunadi. Gimnastica d’acrobatica ei in sport surtut per affons e giuvenils. Sco tier la gimnastica d’atletica ei il cunfin da vegliadetgna contonschius cun rodund 25 onns.
Mustér sco center
«Nus havein retschiert bia laud dall’associaziun svizra da gimnastica d’acrobatica Acro Suisse pil campiunadi. Nus sentin ch’il giavisch dall’associaziun ei che nus propagheien quei sport aunc pli fetg cheu tier nus», constatescha Anja Klittich Berther. La cautrenadra dil center da prestaziun a Turitg, Nina De Schoenmacker di: «Per l’emprema ga ei il mund dall’acrobatica svizzer s’entupaus a Mustér. Nus essan stai fascinai dall’organisaziun, dalla halla e dalla culissa singulara. Igl ei stau in’emperneivla e grondiusa concurrenza.» La gruppa d’acrobatica ei integrada ell’Uniun da gimnastica Cadi ed ei la suletta che porscha gimnastica d’acrobatica sco sport da concurrenza el cantun Grischun. Per promover quei sport sil pli ault nivel existan centers da trenament a Wil, Turitg e Genevra. «Tenor nies manegiar savess Mustér era esser aschia in center. Nus essan vid far ponderaziuns concretas per realisar quella finamira», puntuescha Anja Klittich Berther. Era culla Scola da talents Surselva a Glion seigien ils emprems contacts empusti. Vul dir: Scolaras e scolars dil scalem superiur savessen cumbinar quei sport cun lur scola.
Ei drova la renconuschientscha
«Swiss Olympic stuess renconuscher Mustér sco center, mo persuenter ston las premissas constar. Per part ademplin nus quellas cun nossas trenadras e nos trenaders», di Anja Klittich Berther. In crutsch ei il mument aunc l’infrastructura: «Il Center Fontauna ha fetg bun’infrastructura. Mo nus stuessen haver ina halla culla pusseivladad d’installar leu permanentamein ina matta speciala per nies sport. Quella ha ina surfatscha da 14 x 14 meters. Rumir quella matta suenter mintga trenament ni concurrenza ei cumbinau cun memia bia lavur.» Sco basa da trenament stuessi quella halla star a disposiziun per la gimnastica d’acrobatica minimum denter 20 e 25 uras per jamna. Medemamein duvrassi ei ulteriurs urdeins. Che Mustér daventi center da trenament da gimnastica d’acrobatica ni buc, quei sport vulan las iniziantas porscher en mintga cass era igl avegnir. «Igl interess dils affons ei fetg gronds e nus sentin era il sustegn dils geniturs. Aschi ditg che quei ei il cass, lein nus cuntinuar», di Sara Gadola-Cajacob. Treis entochen quater ga ad jamna vegn trenau. La lavur fatga ils davos dus onns muossi che la gruppa seigi silla dretga via. «Quei havein nus era constatau al campiunadi grischun. Nus havein la qualitad da concurrenzar culs auters ed essan datier dils megliers», di Anja Klittich Berther.
Scola da talents Surselva ei interessada
La gimnastica d’acrobatica savess esser gia igl onn da scola 2025/26 ina nova purschida dalla Scola da talents Surselva a Glion. Sco la menadra da scola Rita Bearth ha detg sin damonda dalla FMR, ein quater mattatschas stadas ad ina sera d’informaziun dalla scola e vegnan a far in fuffergnadi ella scola. Sch’igl interess dad ellas da frequentar la scola ei avon maun, han ellas d’absolver igl examen d’admissiun. «La scola sa porscher igl entir concept da basa era per quella purschida, vul dir la part medicinala e la part polisportiva. Leutier vegn secapescha gimnastica d’acrobatica sco accent culs trenaders dalla gruppa a Mustér», di Rita Bearth. In representant dalla scola hagi visitau il campiunadi grischun a Mustér e seigi staus fascinaus dil sport e dalla purschida. Il cantun mondi medemamein d’accord cull’introducziun da quella sparta nova. Las interessentas ed ils interessents per la scola da talents stoppien esser commembras e commembers d’in cader. Pusseivel seigi quei en quei cass entras l’appartenenza al cader naziunal. (fmr/hh)
Bunas prestaziuns dils indigens
Ils resultats dallas commembras e dils commembers dall’Uniun da gimnastica Cadi al campiunadi a Mustér:
Women’s Pair Combined:
1. Sofia Gzella, Laura Vincenz.
Women’s Group Competition:
1. Celine Weber, Emiliy Weber, Noemi Vögtli. 2. Ladina Sac, Malin Decurtins, Ava Götte.
Mixed Pair Combined:
1. Lidia Semenova, Livio Gadola.
Women’s Group Combined:
4. Alina Gadola, Meret Berger, Patricia Tenner, 5. Jael Flepp, Alina Berther, Maryna Semenova.
Quotidiana dils 14.11.2024