Quotidiana dils 29.07.2024
Ramun Tomaschett (seniester) ed Christian Schnoz (dretg) ein stai ils protagonist dall’occurenza da slackline a Mustér | foto Martin Gabriel
La davosa fin d’jamna han las uniuns la pendenta Mustér e Grischa Slack envidau ad in’occurrenza da slackline Cuflons denter Sontga Gada e Mompé Medel che vegn ad esser naven digl atun proxim il tschancun dalla punt pendenta da Mustér. In scopo da quei event da slackline ei staus da trer l’emprema suga da construcziun per la pendenta sur Cuflons vi.
Martin Gabriel/FMR
L’Uniun Grischa Slack ha engraziau la sonda als iniziants dalla pendenta cun bialas presentaziuns da slackline naven da Sontga Gada entochen vi da l’autra vart da Cuflons a Mompé Medel. Ver 200 persunas han assistiu allas presentaziuns. La dumengia ha Grischa Slack demontau la slackline sur la val. Il medem mument ha ella tratg l’emprema suga per installar la pendiculara da construcziun sur la val vi. Ils dus sochels d’entrada da mintga vart dalla punt ein gia construi. Ella proxima fasa naven digl uost vegnan las ancras per tener e purtar la punt installadas.
Ina via pragmatica
«In representant dalla firma che producescha nossas sugas per la pendenta ha giu l’idea da cumbinar igl emprem pass dallas lavurs da construcziun cun trer ina slackline», raquenta Christian Loretz , il president dall’Uniun la pendenta Mustér. «Quell’idea ei vegnida pér avon treis jamnas.» Ils contacts cun Ramun Tomaschett , il president da Grischa Slack hagien simplificau l’organisaziun digl event. Per la construcziun dalla pli liunga punt pendenta dil Grischun (270 meters) seigi l’occurrenza da slackline ina buna acziun per mussar ch’il project progredeschi, di Christian Loretz. «Secundo eisi ina via pragmatica per trer l’emprema suga da construcziun per la pendenta. En quei mument ch’ils atlets da slackline train anavos lur suga, vegn la suga da construcziun ligiada davostier vida quella e tratga sur la val ora. «Pia havein nus adempliu dus scopos cun ina frida.»
Altezia che fa pialgaglina
In aspectatur sper la slackline ha detg che siu cor batti empau pli fetg cun mirar co ils atlets caminien silla slackline sur la val d’ina profunditad da circa 100 meters. «Tgi che sa con profund che quei ei ora leu amiez smarveglia cun tgei suveranitad ch’ils atlets fan pass per pass.» Allas atletas ed als atlets grischuns da slackline ha quei eveniment plaschiu. En scadin cass ha il slackliner Ramun Tomaschett ch’ei era president dall’Uniun Grischa Slack confirmau quei enviers la FMR. «Che nus havein astgau traversar quella val silla slackline ei in act unic, ina gronda schanza ed igl ei era ina gronda honur per nus d’astgar far l’emprema colligiaziun dalla punt pendenta.» Tenor Ramun Tomaschett seigi il pli bi sin la slackline dalla punt pendenta da veser la profunditad dil flum. «Da veser il Rein che serpegia ed il cuntrast da las colurs dallas plontas ei semplamein fantastic. Jeu sun engrazievels ch’jeu haiel giu la caschun da survegnir quella perspectiva.»
La pendenta ei il tema
Sper l’attracziun da slackline ei la pendenta adina puspei stada in tema duront igl eveniment dalla fin d’jamna a Mustér. «Nus spitgein vess. Per cletg vegn quella punt gleiti», ha ina participonta manegiau. Era il president dall’Uniun la pendenta ha confirmau ch’il sustegn per la pendenta seigi gronds e che biars spetgien sil november ch’ei havessi d’esser aschi lunsch che la punt vegni aviarta. Christian Loretz: «Jeu saiel mo repeter che la pendenta vegn finanziada per 70 % cun daners privats e per 30 % cun daners dil maun public, pia dalla vischnaunca da Mustér e dil cantun. La preschientscha da tonta glieud cheu oz fa fetg grond plascher a mi. Jeu creigel denton era che la critica enviers nies project ei tschessada ad interim.»
Cura che la pendenta ei construida vegni l’Uniun la pendenta sligiada e la responsabladad per la punt vegni surdada alla vischnaunca da Mustér, di Christian Loretz. «La vischnaunca surpren il manteniment ed ei responsabla per la punt. Igl ei era previu da tener aviert la pendenta duront igl unviern.»
«Igl ei ina gronda honur per nus d’astgar far l’emprema colligiaziun dalla punt pendenta.»
Ramun Tomaschett, slackliner e president da Grischa Slack