La superiura da Mustér ha cun siu project «Aua Viva», gudignau il premi dall’jamna da steilas ella categoria scolas, surdaus dall’UNICEF e la revesta «Schweizer Familie». En tut han els vendiu 500 butteglias aua minerala, etichettadas entuorn per in project dall’UNICEF el Bangladesch, nua ch’ins gida fugitivs da clima da survegnir surtut in meglier provediment d’aua ed aua schubra. Il premi ei vegnius surdaus la sonda el teater a Turitg a las scolaras ed als scolars dall’emprema e secunda classa superiura dalla scola da Mustér. Els vessien mai quintau da gudignar, mo il plascher seigi gronds, aschia las scolaras ed ils scolars. Era per Christoph Zingg , plevon a Mustér, ch’ha accumpignau la classa ed er annunziau ella pil premi, ei quei ina gronda e biala surpresa e satisfacziun. Il premi vegni a cattar in plaz special per che tuttas e tuts sappien admirar el. Lura sapp’ins adina seregurdar ch’ins possi muentar era cun pintgas caussas il mund, aschia Christoph Zingg. (rtr/fmr)