Tgi che ha mirau a fin il final dil Cup svizzer ella televisiun la dumengia suentermiezgi ed ei perquei vegnius empau memia tard a Crap Gries ha munchentau il pli probabel pli spert hattrick ella historia da Crap Gries, segir ed en tut cass il pli spert hattrick dapi ch’ei dat l’arena el liug idillic spel Rein.
E sittau quei hattrick ha buc in dils caposettagols dall’equipa da Schluein Glion, mobein il giuven Remy Manetsch . Igl attaccader oriunds da Mustér che ha fatg il davos temps in bien svilup ha marcau suenter 2.56 minutas igl 1:0. Suenter 5.33 minutas il 2:0 e suenter 6.54 minutas il 3:0. El ha pia duvrau exact 4.08 minutas per sittar treis gols e praticamein decider il giug gia ellas empremas siat minutas. E tuts treis gols ha el marcau cun pei segir e sco in ver «goleador».
Tiegl emprem eis el vegnius survius el profund da Ruben Rechenbach , il secund ha Tiziano Vinzens mess ad el sil pei cun ina biala flanca miez-aulta, la quala el ha spediu directamein en gol, e pil tierz eis el vegnius lantschaus da Livio Derungs ella gassa ed ha puspei buca schau schanza al goli da Triesenberg da bloccar il siet.
Suenter quei furioso eis ei vegniu empau pli quiet sil plaz. Ils hosps han empruau da reagir, quei denton senza grond success ed ils indigens han reduciu empau il tempo. Tuttina ha l’equipa dil trenader Patric Casutt aunc marcau treis gadas entochen pausa. Il 4:0 ha Lars Caduff sittau.
El ei vegnius lantschaus dil goli Flurin Capaul cun ina balla liunga sur l’entira defensiun ora. Il 5:0 ei staus ina cumbinaziun denter Lars Caduff e Ruben Rechenbach che ha la finala alzau la balla sur il goli ella reit. Cuort avon la pausa ei lu era aunc il 6:0 curdaus e quella gada ei puspei Remy Manetsch staus en retscha da marcar. Bein survius da Livio Derungs ha el buca munchentau da sittar ord cuorta distanza siu quart gol persunal.
Suenter la pausa ei lu buca curiu bia pli sil plaz, il qual era malgrad la ferma plievgia dils davos gis en in fetg bien stan, quei era perquei ch’ils responsabels pil pastget ein stai ils davos gis fetg savens sil plaz per tgirar e mirar d’el. Gols ha ei dau mo in pli e quei pil hosp da Triesenberg. Zivan Mitrovic ei mitschaus alla defensiun ella 79avla minuta ord ina posiziun che ha ferdau fetg ferm d’ordgiug e ha marcau il gol d’honur.
Dapli ei buca gartegiau als hosps ed ulteriurs gols ein era buca gartegiai a Schluein Glion, forsa era perquei ch’il trenader ha midau ora Remy Manetsch suenter ina bun’ura e ha aschia schau retscheiver el igl applaus meritau dallas aspectaturas e dils aspectaturs.
Beat Dermont