Las vischnauncas Dadens e Dado ein els cavegls ina l’autra. Per quei motiv duei ina statua plazzada sils cunfins procurar per pasch. Mo quei ei buca aschi sempel. La Gruppa da teater Mustér presenta las proximas jamnas la cumedia «Tgei stress pervia d’ina statua» scretta da Hubert Giger. Dallas 15 acturas ed acturs sin tribuna ein otg affons ni giuvenils.

Hans Huonder/FMR

Buns cunfins fan buns vischins. Quei proverbi tucca ualti bein la noda dalla cumedia che la Gruppa da teater Mustér presenta las proximas jamnas sin tribuna en halla Cons a Mustér. «Tgei stress pervia d’ina statua» ei in toc humoristic – mo era cun dabia verdad – da Hubert Giger . Igl ei l’emprema cumedia ch’igl autur da Platta en Val Medel ha scret. Da sia plema deriva era il drama «La Stria da Dentervals» ch’ei vegnida presentada a Mustér la stad 2019.

Lavur da promoziun sepaga

La reschia dil toc meina Tina Bundi . Dapi biars onns eis ella engaschada ella reschia a Mustér. Igl emprem surtut sco menadra e reschissura dalla gruppa da teater d’affons. Quella lavur porta fretg ussa. Ella cumedia che ha premiera sonda, ils 18 da schaner 2025 ein 15 acturas ed acturs sin tribuna, da quei otg affons e giuvenils ella vegliadetgna dad 11 entochen 15 onns. Quella regiuvinaziun dalla gruppa legra era il president dall’uniun Tino Sabbadini : «Quei ei secapescha fetg bi e da grond’impurtonza pigl avegnir da nossa gruppa.»

Ina situaziun da luxus

Tina Bundi che ha fatg la lavur da promoziun dils affons e giuvenils ils davos onns ei buca meins satisfatga da quella situaziun: «Sche nus mirein entuorn en gruppas ed uniuns da teater en auters loghens che han difficultads da rabitschar ensemen acturas ed acturs, astgein nus veramein esser fetg ventireivels dalla situaziun actuala. Igl ei ina situaziun da luxus.» Omisdus – Tino Sabbadini e Tina Bundi – ein perschuadi d’in bien avegnir. La Gruppa da teater Mustér dumbra il mument 34 commembras e commembers. Ils giuvens vegnan recepi ella vegliadetgna da 16 onns (mira box).

Ina statua duei procurar per pasch

La cumedia «Tgei stress pervia d’ina statua» va buca mo aprau culs tocs humoristics che la Gruppa da teater Mustér ha presentau ils davos onns. «Sin fundament dalla scenaria drova ei affons e giuvenils. Quella caschun havein nus vuliu nezegiar per integrar novizs el toc. Il toc ei screts aschia ch’ils affons e giuvenils ein ils heroxs», di la reschissura Tina Bundi. La sfida dalla mischeida d’acturas ed acturs da pliras generaziuns para buca d’esser greva ni cumplicada: «Jeu hai luvrau ils davos onns sin tribuna ton cun carschi sco affons. Quei cheu ei ina nova e biala experientscha.» Ei detti bein ina differenza: «Ils affons emprendan bia pli spert, mo han forsa buca gest tonta pazienzia sco ils carschi.»

Pointas dil mintgadi

La cumedia «Tgei stress pervia d’ina statua» da Hubert Giger ha spargnau lavur da translaziun per romontsch alla Gruppa da teater Mustér. Mo ella ha aunc in’autra qualitad. «La cumedia viva dil plaid. Igl autur lavura cun sgnoccas e pointas dil mintgadi. Quei ei particular», di Tina Bundi e constatescha plinavon: «Ei dat parallelas cul toc ‹La stria da Dentervals›, per exempel la finiziun cun ina canzun.» La cumedia tracta il stress pervia d’ina statua. Las vischnauncas Dadens e Dado han viviu en discordia entochen uss. Per puspei ver la pasch ha ina cumissiun sviluppau in plan: Ina statua duei vegnir tschentada sils cunfins denter las duas vischnauncas. Mo quei plan reussescha buca. Las vischnauncas decidan da boicotar ina l’autra. Per anflar ina soluziun en quella situaziun vegn ei fatg dertgira – cun consequenzas.

* Las producziuns dalla cumedia «Tgei stress pervia d’ina statua» en halla Cons a Mustér vegnan dadas sonda, ils 18 da schaner allas 20.15, venderdis, ils 24 da schaner allas 20.15, sonda, ils 25 da schaner allas 20.15, dumengia, ils 26 da schaner allas 14.00, venderdis, ils 31 da schaner allas 20.15 e sonda, igl 1. da fevrer 2025 allas 20.15. Reservaziuns da plaz per telefon 077 205 85 05 gliendisdis e mardis dallas 19.00 – 21.00 ni it-surselva.ch/gtm.

Bab e feglias communablamein sin tribuna

La Gruppa da teater Mustér unescha uonn pliras generaziuns sin tribuna ella cumedia «Tgei stress pervia d’ina statua». Aschia sepresenta Tino Sabbadini (44) cun sias duas feglias Leonie (13) e Chiara (11) el toc humoristic cun treis acts. «Per mei ei quei segiramein enzatgei tut special. Igl ei l’emprema ga che nus fagein teater communablamein», di Tino Sabbadini ch’ei president dalla gruppa da teater dapi sis onns. Gnervus vegni el pervia da quei denton buca. Da gnervusadad ei denton era da sentir nuot tier las duas mattatschas, silmeins buca alla sera d’exercezi. «Forsa ei quei lu auter cura che la halla ei pleina», relata Leonie Sabbadini. Mo speciala seigi la situaziun sin tribuna tonaton cul bab sco actur. «Igl ei empau curios co il bab tschontscha. A casa plaida el buca aschi dad ault», manegia Chiara Sabbadini. Dapi treis onns ein ellas commembras dalla gruppa da teater dils affons a Mustér e per l’emprema ga sepresentan ellas uonn culs carschi. (fmr/hh)