La squadra da dunnas dalla Surselva: (davos da seniester) Luzia Tschuor, Danja Cavigelli, Sina Demont, Romina Cavegn e Silja Montalta, (amiez da seniester) Corsin Cavegn (trenader), Flurina Carigiet, Valentina Albin, Mara Blumenthal, Anna Lena Dolf, Lina Rieder, Laura D’Atria, Lorena Spescha, Bea Caduff (trenadra) e Reto Caduff (trenader), (davon da seniester) Ladina Carigiet, Jana Caduff, Chiara Lorena Cavegn, Vera Krämer, Martina Beeli, Laura Casanova, Jasmin Bearth e Selina Tomaschett. Silla foto mauncan Lya Berni, Andrina Cathomen, Ronja Muoth, Lucia Seiler, Xenia Dietrich (fisio) ed il trenader da golis Edwin Cathomas. Foto mad
La squadra da ballapei dallas dunnas dalla Surselva ha brigliau quest atun. Ella ha gudignau tut ils giugs dil campiunadi regiunal ed ei sin buna via dalla 4. ella 3. ligia. Per la trenadra Bea Caduff-Seiler ei quei success il resultat da lavur consequenta dils davos onns. L’equipa ei semegliurada sill’entira lingia.
Hans Huonder/FMR
La bilanza dil campiunadi da ballapei dallas giugaduras activas dalla Surselva per quest atun savess buca esser megliera. Ella gruppa 1 dalla 4. ligia han las Sursilvanas dominau claramein il campiunadi ed ein cul maximum da 21 puncts ord siat giugs alla testa dalla tabella. Primavera cuntinuescha il campiunadi regiunal e cun ina prestaziun semeglionta a quella da quest atun ei la promoziun dalla 4. ella 3. ligia segira.
Luvrau consequent
«Ils davos dus onns havein nus fatg progress ella defensiun sco el miez ed ell’attacca», di Bea Caduff-Seiler che trenescha l’equipa dallas giugaduras activas dalla 4. ligia. Ella fa quei communablamein cun Reto Caduff e Corsin Cavegn . Il grond progress dalla squadra da dunnas ei reussius ils dus davos onns ed ha plirs motivs: «Enteifer l’equipa ha ei dau mo paucas midadas e cun Romina Cavegn, Ladina Carigiet e Mara Blumenthal havein nus retschiert treis ulteriuras bunas giugaduras.» Suenter ch’ei seigi reussiu da stabilisar la defensiun, seigi ei vegniu dau peisa al miez ed all’attacca. Quellas stentas semuossan el campiunadi da quest atun: En siat giugs ha la squadra sursilvana sittau 33 gols e retschiert sulettamein treis.
Cun bien sentiment egl unviern
Il cader che dumbra 24 giugaduras dall’entira Surselva sa ir cun bien sentiment ella pausa d’unviern e cun buna speronza da contonscher la promoziun ella 3. ligia. «En sesez savein nus mo batter nusezzas, pertgei igl avantatg sil secund, Mels, munta gia tschun puncts suenter quels emprems siat giugs. Per nossa dominanza havein nus survegniu cumpliments da giugaduras e trenaders d’autras equipas, mo era d’arbiters», constatescha Bea Caduff-Seiler.
In proxim pass da svilup
Schegie che la promoziun sto aunc vegnir contonschida, di la trenadra: «La 3. ligia ei ina finamira e fuss secapescha ina nova sfida per l’entira equipa. Ei fuss era ina buna caschun da far in ulteriur pass el svilup dall’equipa.» En giugs amicabels encunter las squadras da Cuera 97 e Domat hagi si’equipa mussau ch’ella sappi schizun tener petg ad equipas dalla 2. ligia. Bea Caduff-Seiler ei perschuadida: «Cun nossa squadra savein nus concurrenzar bein ella 3. ligia, forsa buca gest davontier, mo segir el miez dalla tabella.» Negin tema ei ina secund’equipa d’activas il mument che la promoziun ella 3. ligia reussess: «Persuenter havein nus buc avunda giugaduras. Duessen entginas junioras seruschnar suenter ils proxims onns, savess quei esser pusseivel.»
Quotidiana dils 11.11.2024