Il comite ei satisfatgs (da sen.): Fabiana Bearth, Corina Venzin, Aurelia Giger, Danilo Giger ed Ivo Pally. Foto Augustin Beeli
L’Uniun da giuventetgna Medel ha envidau sonda per la secunda gada al FestiVal Medel. Buca mo il comite d’organisaziun ei satisfatgs. Massa visitadras e visitadras, pign e grond, han gudiu quell’occurrenza.
Augustin Beeli/FMR
Musica, marcau, magliar: quels treis cavazzins ein stai el center dil FestiVal Medel. Buca mo quels, bubrondas ha ei secapescha era dau. Lezza ei indispensabla per mintga occurrenza, nua che carstgauns s’entaupan per festivar e guder. Sonda han ins fatg quei a Curaglia. L’aura malsegira e la dracca dalla notg eran vargai. Il comite d’organisaziun haveva patertgau vid mintga detagl. «Ei para ch’els hagien giu bien contact schizun cun sogn Pieder», han ins udiu pliras gadas els discuors en cumpignia. Cun «els» han quellas persunas manegiau l’Uniun da giuventetgna Medel. Entuorn la casa communala a Curaglia han ins constatau in pulit travasch.«Nus essan pli che cuntents e vessen mai quintau cun tonta glieud», ha Corina Venzin lu era detg alla FMR. Ella ha tgamunau il comite dil FestiVal Medel 2024. Gl’uost 2020 haveva l’uniun lantschau gl’emprem FestiVal Medel, singuls commembers havevan lu confirmau alla FMR che las premissas seigien bunas ch’ei detti zacu ina secunda tala fiasta.
Dapi 41 onns sin tribunaEi ha cuzzau quater onns. L’Uniun da giuventetgna Medel ha buca spargnau cun breigias e lavur da preparar il secund FestiVal Medel. «Nus essan empau loschs ch’igl ei gartegiau da rimnar 17 stans da fiera», ha Corina Venzin manegiau el decuors dil suentermiezdi el discuors culla FMR. Ella e sia squadra cumpletta da 47 giuvnas e giuvens ein stai en acziun, u ella gastronomia ni per tut ils giavischs e problemins.
El curtin da tschella vart dalla casa communala ha Placi Flury presentau naven dallas 13.30 las bands. Alexi & Marcus fetschien musica romontscha. «Els ein dapi 41 onns sin tribuna, quei ei bein ina prestaziun admirabla che mereta respect?», ha el dumandau gl’auditori. Pign e grond han applaudiu. Serimai avon la tribuna han els giu tschaffen dalla musica dils cantauturs. Las biaras melodias s’audan oz tiel scazi popular dalla Surselva.
Quella gada senza mascrinaLas limitaziun che havevan valiu avon quater onns duront la pandemia han ils biars emblidau. Lu valeva l’obligaziun da mascrina e tut era pli steri e steril. Sonda han ins saviu circular ed ir libramein da stan a stan. Quels eran sereparti per liung la streglia sur ils curtgins. Sil plaz avon la casa communala han ins saviu seser e guder senza tema d’urezis ni dalla pandemia.
Silla tribuna da musica ha aunc treis bands sunau, el decuors dil suentermiezdi la band da rock da Glion NoHornyFuture e la sera il duo Matt ed Esra Buchli da 77 Bombay Street. Viaden ella notg ha la band VolxRox sunau e cantau en dialect bernes e franzos. Suenter ch’il secund FestiVal Medel ei gartegiaus ha l’Uniun da giuventetgna Medel motiv avunda da patertgar vid il tierz.