Igl Indoor Festival da Mustér cuntinuescha, denton sut ina nova enzenna. El senumna da niev Indoor Sounds Mustér e stauscha il termin da fiasta dalla primavera sin la fin d’uost.
Andreas Cadona / FMR
Era egl onn 2025 dat ei in festival da musica a Mustér, denton sut in auter num. Sco quei che Florian Zanin , il cau dil comité d’organisaziun digl Indoor Festival, ha tradiu alla FMR senumna l’occurrenza musicala da niev Indoor Sounds Mustér. «Il plaid festival plascheva buc exnum a nus ed era empau irritonds per bands ed agenturas.» Florian Zanin gi che las bands ed agenturas hagien paregliau igl event da Mustér cun festivals gronds e consequentamein era pretendiu las gaschas leusuenter. «Nus essan denton in event da duas seras cun buna musica aschia ch’il num sounds declara meglier tgei che nus fagein e purschin.»
La fin d’uost
La midada da num ei denton sulet ina dallas novaziuns digl Indoor Sounds Mustér. «Il datum stuschein nus sin la fin d’uost». E quei datum pil proxim Indoor Sounds Mustér ei gia fixaus sco quei che Florian Zanin ha tradiu, numnadamein ils 20 e 30 d’uost 2025. Treis bands per sera ed ina after show party duei carmalar il publicum a Mustér. Igl Indoor Sounds seconcentrescha egl avegnir sin musica da pop e rock e desista da rap e hip hop. «Il vendergis sera dedichein nus ad in tema special.» Il motiv dalla midada da termin schai en ina futura collaboraziun cun ina auter event musical. Tgeinin che quei ei ha Florian Zanin aunc buca vuliu tradir. «La cunvegna ei aunc buca dil tuttafatg sut tetg.» El spera da saver porscher ulteriuras informaziuns la fin dil meins october. Senza quella collaboraziun fuss igl avegnir dallas duas seras da concert a Mustér staus periclitaus, quei ha Florian Zanin confirmau. El e ses cunorganisaturs speran, grazia allas novaziuns, da puspei carmalar dapli publicum als concerts a Mustér. Principlamein igl Indoor Festival dalla primavera vargada e cunzun las visetas dils concerts dil vendergis sera han buca pudiu ademplir las spetgas dils organisaturs.
Quotidiana dils 21.10.2024