Quotidiana dils 08.08.2024
Silvan Venzin da Mustér ei in giugadur pissiunau da quadrels magics. L’autra jamna conorganisescha el in turnier da quadrels magics a Mustér.
La fin d’jamna dils 17 e 18 d’uost 2024 ha liug a Mustér per l’emprema ga in turnier da quadrels magics. Iniziant e conorganisatur dil Grischun Open ei Silvan Venzin che separticipescha activamein a turniers dapi entgins onns. El spetga rodund 50 participontas e participonts da pliras tiaras.
Hans Huonder/FMR
Tgi enconuscha buca els: ils quadrels magics. Rubik’s cube – sco els vegnan numnai per engles – ei aschidadir ina fuorma da puzzles cun quadrels da volver. La finamira ei da haver tuts ella posiziun correcta. Da quels quadrels magics dat ei ina partida da differenta grondezia e surtut era cun differents diembers da singuls quadrels. Avon sis onns ha la fascinaziun per quell’activitad tschaffau igl interess da Silvan Venzin da Mustér. Dapi lu trenescha el pliras uras per jamna per aschia sligiar la magia dils quadrels aschi spert sco pusseivel. El serenda a turniers ed avon biebein miez onn a Ligiaun ha el schizun contonschiu in record svizzer. 3,18 secundas ha el basignau per sligiar il pensum dil quadrel skewb. Quei record ha el denton piars la fin da zercladur a Sachseln. «In bien camerat da mei ei miu successur», di il Silvan Venzin ch’entscheiva prest la tschunavla classa al gimnasi dalla claustra da Mustér.
Avon agen publicum
En ina contribuziun dalla FMR il fevrer vargau ha Silvan Venzin detg ch’el organisassi bugen in turnier da quadrels magics a Mustér. Sonda e dumengia, ils 17 e 18 d’uost 2024 va quei giavisch en vigur. Lu semesiran ina partida adherents dil quadrel magic el Center Fontauna al Grischun Open.
Il turnier ha liug leu sin iniziativa persunala da Silvan Venzin: «Jeu selegrel fetg ch’il turnier ei cheu a Mustér e secapescha hai jeu era plascher da separticipar. Jeu sperel che tut funcziuni bein quels dis.» El ei igl organisatur e la persuna da contact el liug, ferton che SwissCubing – l’associaziun naziunala dallas giugaduras e dils giugadurs da quadrels magics – segna sco responsabla pil turnier e finanziescha l’infrastructura necessaria. Silla damonda, tenor tgei criteris ch’in liug vegni risguardaus per in turnier, di Silvan Venzin: «Ei vegn arranschau turniers ell’entira Svizra e sigl entir mund. La cundiziun ei che l’infrastructura sco per exempel la halla plurivalenta dil Center Fontauna stetti a disposiziun persuenter.
Giugadurs da pliras tiaras
Pil turnier da l’autra jamna el Center Fontauna a Mustér spetga Silvan Venzin l’annunzia da rodund 50 entochen 60 participontas e participonts. Entochen ussa ein 38 s’enscrets, il termin per la fin d’annunzia ei l’autra jamna sut worldcubeassociation.org. La gronda part dallas persunas ch’ein gia s’annunziadas deriva dalla Svizra e l’Austria, singuls ein era d’autras tiaras sco la China, Russia ni Grecia.
Duront ils dus dis concurrenzeschan ils giugadurs en otg differentas categorias cun mintgamai ina entochen treis rundas. In e scadin, independent dalla vegliadetgna, sa separticipar a mintga categoria, sto lu denton ademplir ina limita da temps per contonscher ina eventuala ulteriura runda. Per la participaziun als turniers vegn fatg neginas cundiziuns. Sco Silvan Venzin di, ein persunas che han interess da persquitar las participonts ed ils participonts beinvegnidas: «En quei connex dat ei la regla ch’ils aspectaturs stattan sin ina distanza da silmeins 1,5 meters naven dallas giugaduras e dils giugadurs.» Sco premis dat ei alla fin certificats pils megliers.