Cun agid dils pumpiers da Sursassiala han ils inschigniers dalla punt pendenta da Mustér testau il niev indrez. Cun biabein 20 tonnas repartgidas sin l’entira punt ei la pendenta sestentida tenor las calculaziuns dils planisaders. Ils 16 da november 2024 vegn la punt surdada a siu diever.
Andreas Cadonau/FMR
Ils emprems pass sin la punt pendenta che sestenda da niev 300 meter sur la val naven dalla caplutta da Sontga Gada e Mumpé Medel tradescha: La punt francada cun sugas ei stabila e semuenta strusch e la vesta ella val ei spectaculara. Sandro Muscas e ses nov collegas dil corps da pumpiers da Sursassiala han probabel buca giu tonta peda da sefatschentar culla vesta. Els ein stai involvai la sonda vargada en ina acziun empau speciala. Ils pumpiers han mess in bischel sur la punt pendenta per emplenir 25 chistas cun aua. Las chistas ein stadas cuvridas cun plastic per che l’aua untscheschi buc. Sandro Muscas ha tunschiu il meter ella chista. «En ina emprema fasa stuein nus emplenir las chistas cun 30 centimeters aua e pli tard cun 60 centimeters.» En tut ei la pendenta stada cargada la sonda vargada cun ina peisa da 20 tonnas. L’aua han ils pumpiers carrau neutier da Salaplauna.
Negin test obligatoric
Dalla vart da Mustér han ils inschigniers controllau co la punt reagescha sin la peisa. Christian Loretz , president dalla Uniun punt pendenta ei sez inschignier ed el gi che quei test da peisa seigi buca obligatorics. «Nus lessan semplamein saver, sche quei che nus havein quintau teoreticamein secumporta cun la practica.» Christian Loretz gi ch’ei detti buca tonta experienza cun punts pendentas visavi a punts da betun. «Tier ina punt da betun enconuschan ins exact co ella semuenta sut tgei cundiziuns e peisas.» Ina punt pendenta da fiera reagescha pervia digl itschal gia bia pli fetg silla temperatura. Ed igl inschignier fa attent allas biaras colligiaziuns che tegnan la pendenta: «Quei simplifichescha buc exnum da quintar la stabillitad dalla punt.»
Gl’emprem ha ei giu num d’emplenir las chistas dalla vart da Mumpé Medel e silsuenter dalla vart da Mustér. Il geometer ha giu en mira cun sia apparatura ils puncts fixs vid la punt montai aposta per miserar ed ils resultats ein flessegiai sil monitur da Christian Loretz. «Las 20 tonnas ein sulet in dieschavel dalla peisa che la punt po la finfinala purtar.» Tenor la teoria dils planisaders havess la pendenta da sbassar per 80 centimeters enaquella che las 25 chistas ein emplenidas cun las 20 tonnas aua. Christian Loretz ei fetg cuntents cun quei ch’el vesa sil monitur. «Nus essan fetg fetg datier da quei che nus havein quintau.» Cun l’acziun dalla sonda vargada stat nuot pli en via, respectiv silla punt per impedir l’avertura ufficiala dils 16 da november 2024. Las chistas han Sandro Muscas e ses collegas puspei allontanau. Grazia alla pendenta s’avischina Mumpé Medel in bienton pli datier a Mustér.